Signori bona sira a tutti vui.
Ve parre' Larry King 'e Washington;
Ve dugnu 'aguri d' 'u duimila e dui!

'Stasira ia tiegnu tanta gente
Allu programma d' 'a CNN;
'U primu mue ve passu 'u presidente.

Saluti amici nuostri laghitani
E tutt' 'i cittadini de lu mundu
D' 'u presidente de li 'mericani.

'America chi nde vuliau lla hina;
E cchine se puo` mai dimenticare
'U undici 'e settembre la matina?

Su' stati hatti veri e no storielle
'I vampi de lu huocu e llu terrure;
E su' crollate le turre gemelle.

Ardienu li pompieri pari pari
A Nnova Yorca ed alla capitale:
Civili, puliziotti e militari.

Si nde ridie' llu capu d' 'i banditi
Chi n'a` scussatu 'u hierru e llu cimentu
Ma no lle radiche d' 'i Stati Uniti.

Aju 'e 'nterrumpe lu cumunicatu.
Ia signu Larry King n'atra vota;
Ccu llu "sceiccu" signu collegatu.

Stative cittu nun faciti strusciu;
Avimu sulu dui minuti 'e tiempu,
"Osama" vuo' parra' ccu "Giorgiu Busciu".

'America sta' tremandu tutta quanta,
De Est ad Ovest e de Nord a Sud,
E lla pagura a bui ve ha' novanta.

Su' bielli chjiari li progetti mia:
A ttia te cunsignamu alla giustizia
O la giustizia purtamu ndo ttia.

'Na cosa sula ti le' ricurdare:
Ca nui simu disposti de murire,
Cu' vui teniti voglia de campare.

Tu statte a ssente' a mmia brutta carogna:
Avoglia chi t'ammucci sutta terra
Ca te stanamu cuomu la mivogna.

Amicu nun te hare lu spahante!
Si vieni alle muntagne 'e "Tora Bora"
Te mintu lu pigiama e llu turbante.

Aspiettu chi ppe ttia vene' llu turnu;
T'aju 'e cunzare ccu llu cuvu a bientu
Ed e' pregare cinque vote 'u jurnu.

Ccu l'ajutu 'e "Allah" vena' lla hina,
Chi primu de t'appendare a 'na grue
Te 'ncugnu de simenta 'e paparina.

Si 'i genti mia si nde hau 'na sbornia
Le' inchjiu 'nu scarpinu d'esplosivi
Te simminu intra mare 'a California.

Te mandu l'apparecchji 'mericani
E nun ce resta' n'arvule all'all'irta;
Vrusciamu terroristi e talibani.

Pienzu ca 'i cunti ti l'a' hatti male
E ormai 'u mundu avissi de capire;
Si tu 'nu terrorista e criminale!

E cchilli 'mericani cuomu e ttia
Chi anu cacciatu 'na muntagna 'e sordi
Pped'addestrare lu rigime mia.

E n'aviti pagatu e 'ncuraggiatu;
Ie' stata 'a 'ntelligenza 'mericana
Chi n'a' cumpratu l'armi e n'a' criatu.

'Un cc'ie' bisuognu chi ve dugnu prove:
Armati cuntra 'i "Russi 'e Gorbacioffu"
'A guerra Santa d' 'u settantanove.

Ia signu 'u capu de li talibani
E cc'iaju piersu n'uocchjiu cumbattiendu
Vicinu li cunpini Pakistani.

E cchissi lluocu sunu 'i Stati Uniti;
Abbasciu ipocrisia ed imperialismu
E tutte le ricchizze chi teniti.

Signori mia, v'aju 'e disturbare
direttamente de la "Casa Bianca".
Cc'ie' Lora Bush chi ve vue' parrare.

Signu remasta offesa e stralunata
De le parole de chillu cristianu
Chi all'uocchji mia le pare 'nu pirata.

Parravadi de civilizzazione
E allu paise sue cc'ie' 'nu rigore
Chi 'un puonu vide' la televisione.

Scusa si te respundu siccu siccu,
Ma primu 'e tuttu quantu me prisientu:
Una de le muglieri d' 'u"sceiccu".

Secundu chillu chi anu dittu a mmia
A bui nun be 'nteressanu 'e notizie
Ca ve viditi la pornografia.

'Everu ca ppe costume talibanu
Si 'e himmine se vuo' pittare l'ugne
Le taglianu li jidita d' 'e manu?

E all'uomini chi tradiscianu la sposa
L'ammazzanu a petrate 'mmienzu 'a chjiazza
E doppu pue le tagliau chilla cosa.

Ia sacciu ca li' 'mpicanu alla hurca
E a bui ppe b'ammucciare la vrigogna
Ve cumboglianu 'a hacce ccu llu burqa.

Ti l'aju 'e dire ccu derittu core
Vui certu la vrigogna 'u lla ventati
Ca caminati ccu llu cuvu 'e hore.

Un bale mancu 'a pena 'e nde parrare;
'Un be putiti minte' 'i tacchi tisi
Ca l'uomini ve sentau caminare?

Vui 'mbece 'u palisati chjiaru chjiaru
E be grupati 'i vrava e llu villicu
E certe vote puru 'u tupinaru.

Siti arretrati e chjini d'illusione;
Pregati puru 'ntra lu gabinettu
E v'ammazzati ppe lla religione.

'Everu nui pregamu ad ogne rasa...
Ma vui jati 'a duminic'alla Missa
"Santi de ghjiesia e diavuli de casa".

(clicca sull'immagine per ingrandire)
Da sinistra: Piero Mazzotta, Anna Perri, Sabatino Mazzotta,
Carmela De Vellis, Carmine Porco, Danio Valle e Romolo Groe

Scusatime ppe n'atri dui mumenti.
Arriva' 'na notizia 'e Kandahar
Ca su' cessati li bumbardamenti.

Pero` lu capu de li talibani
S’a' tagliatu la varva ed ie’ scappatu
E a' pigliatu ppe fissa 'i 'mericani.

Osama puru mancadi all'appiellu;
Si nd'ie' fujutu ndo lli pakistani,
Forse a ccavallu de 'nu ciucciariellu.

E d’accussi' ie' finita 'a sceneggiata;
'I "Busci" àu' fattu 'na higura 'e hissa;
'I 'mericani n'atra pacchjianata!