A 'stu paise chi me piace tantu
Le aguru cent'anni assai cuntienti;
Me suonu la chitarra e biegnu cantu.

Assiemi ad illu cantu puru ia;
Simu venuti ccadi tutt' 'i dui;
Ve damu 'aguri de la Bifania.

Attientu quandu scindi allu scavune;
Rispetta la presenza d' 'a terzina;
'U sta' curriendu appriessu a 'nu pallune.

Scusa si 'ud'e' seguitu la sunata
Ed aju piersu 'u hivu de la nota:
Guardave' si vidie' la nnamurata.

A dire 'a veritate ia me spagnu
E piensu ca ie' deveru mavu signu
Para' ca pierdu n'avutru cumpagnu.

Quandu la tiegnu ccádi avanti a mmia,
Ccu 'na guardata de chill'uocchji sue
Refriscu l'anima e lla fantasia.

Avutu d'accussi´ nun pue cadire;
'U lla pigliare mai alla leggera
Ca ppe 'na himmina se puo' murire.

Si ia muoru ppe cchissa nun me pientu
E se chjiudanu l'uocchji de n'amante
Chi moradi d'amure ed ie' cuntientu.

Aju capitu ca si' cuottu 'everu
Ma diciame chin'ie' 'su bene caru
Chi t'a' purmisu d'essere sinceru?

'Na paparina russa de 'nu pratu
Chi mmienzu all'atri juri coloriti
Sulu illa me lassa' senza jatu!

Tieni 'na freve chi scerne' de hore
Hatte trappa' la frunta ca te curu
Vida ca vrusci 'e vene de lu core.

Ricordate 'na vota cchi m'a' dittu:
L'amure ie' cuomu mille chilowatte
'U llu tuccare ca cce riesti mpittu!

Si te ricuordi t'aju dittu puru:
Quandu t'accuorgi ca diventa' caru
Ncumminci a batte' 'a capu ad ogne muru.

Amure amure cchi m'a' hattu hare?
Forse deveru m'a' hattu 'mpazzire;
Si tu vue sente' a mia lassala stare!

Tu dici allura - fidate de mia
Ccu 'ssa liberazione chi cc'ie' mue
'Un passi 'na jurnata 'ngrazia 'e Dia!

Tu dici d'accussidi, ma nun sai
L'intimitate chi cc'ie' fra de nui:
Me jura' sempre ca 'u mme lassa' mai!

'U ha' ppe tene' l'uominu cuntientu
Chillu chi 'a himmina diciadi all'amante
Scrivalu supra 'i vrava de lu vientu!

Ia mi la spusu e cce hazzu la pacchjia
Attientu tuni 'un te piglia' 'na vecchjia
Chi, pue, la puorti appriessu cu' 'na racchjia.

'U mme nteressadi 'e 'na bella stacca
Si ia me nzuru mi la pigliu ricca
Chi me porta' dinari 'ntra la sacca.

Amici ve salutu ccu 'sta nota
E si l'annu chi vena' ne’ mbitati
'I dui cumpagni cantau n'atra vota!