Signori bona notte aju hurnutu
Me perdunati si cci aju sbagliatu
E speru ca la strina v'a' piaciutu.

Epprosit!

Ia circu scusa a tutt' 'a cumpagnia
L'amicu mia nun arraggiune' cchjiui
Chisa` cchi ll'ie' successu ppe lla via!

Speru ca 'i siensi li mintadi a postu
E torna' ccadi e llu tuoccu alli tasti
E llu hazzu cantare ad ogne costu.

Si tuni me permetti e me cunciedi
Datu c' 'a marcia avanti nun ce vadi
'Stasira vuogliu jire culu-arriedi.

Tu m’a' 'nciutatu e sientu l'uocchji stanchi
E de pensieri me divachi ed inchji;
Hazzu cuomu lu ciucciu 'e Francu Franchi.

Nui cce simu de razza tutti quanti
E ssi 'ncapunisciu 'u hazzu veramente...
Ma puru 'u zuoppu circa' de ji' avanti.

Ia sacciu ca se trasa' de la porta
Puru si la hinestra era' raperta;
Si vue chi cantu, ia cantu alla storta!

Si m'aju 'e sedare cchi male cc'iedi
Si 'a seggia mia se conza' cuomu vuodi?
E mintu 'a capu 'ndo - Tieni li piedi?

Si 'mbece de 'na spina vue 'na rosa
E 'mbece de 'na vucca diliziussa;
Ia vuogliu arraggiuna' ccu n'atra cosa?

E si allu postu 'e mele hundu vitru?
E lle parole 'mbece de lu metru
'E vuogliu misurare ccu llu litru?

'A strina nostra parre' suva suva
Cu' annu passatu, chi ogne parova:
Au' misurata ccu lla menzaruva.

Vida si 'a pinna tue tena' llu stucciu
C'aggiungiu quattru righi a 'sti pagliacci;
Tu vue lavare la capu allu ciucciu?

'A strina nostra 'ud'ie' strina 'e cundanna
Ca ia 'u ll'aju tuccata ccu lla pinna;
'U lla tucchere' mancu ccu 'na canna!

'Un simu ligna de li stessi fasci
E ne' rumuri de li stessi strusci;
Ne' simu mai caduti tanti vasci.

A llu signore chi a' telefonatu
Chi la cuscienzia si l'avie' binduta
E la 'gnoranza l'avie' stralunatu...

Tu vidi de 'na ricchjia e sienti 'e n'uocchjiu
'A capu a' d'esse' tutta senza horchjie
E llu ciarviellu 'u tieni a 'nu jinuocchjiu.

Ia piensu ca 'stu mundu 'na' custritti
'U stare buonu n'a' 'mbrugliatu a tutti
'I stuorti vanu miegli d' 'i deritti.

Si certe vucche vuonu hare 'a sc-cuma...
Nui simu sulu amanti de la rima
'U nne' 'nteressa' quale hurnu huma'!

Amici bona sira me prisientu
'St'annu tiegnu 'na strina scunchjiudente
Ma 'e chillu chi ve dicu nun me pientu.

Si le deritte nun su' state chjiare
De 'stu paise mi nde vuogliu jire
Ca 'e cose storte 'u lle puozzu durare!