Attilio Ziccarelli viene da Edmonton (Alberta) a partecipare al Festival della “strina laghitana” di Toronto, dove riabbraccia un gran numero di amici e parenti che non rivedeva da oltre trent’anni. Qui egli incontra e conosce anche giovani figli di laghitani che, altrimenti, non avrebbe mai avuto modo di conoscere. Rimarrà davvero contento di aver fatto questo viaggio e porterà nel cuore il calore dei paesani, i sospiri delle chitarre e i canti dei poeti. Avrà sempre vive negli occhi le immagini di questa grande festa laghitana.

Metro - Terzine di endecasillabi a rima alternata

Un sacciu quanti 'e vui me canusciti:
Attiliu 'e Renciu de Edmonton;
Ve puortu tannti agúri e v’ 'i spartiti.

Ppe mme truvare assiemi a ste famiglie,
E ppe benire a sèntere la strina,
Aju viaggiatu quattrumila miglie.

Torontu me paríe’ tanta luntana;
E 'mbece signu ccàdi 'mmienzu a bui
Ndo cantadi la Musa laghitana.

Ndo cc’iedi urdure de 'na bella hesta:
Cumpe’ Hidile, 'Ntoniu, Peppe e Francu;
Me paradi ca signu alla Huresta.

Chine vene’ d’avanti e cchine 'e fiancu,
Cu’ quandu ne vidissimu alla chjiazza;
Eppuru su’ trent’anni chi cce mancu.

Stasira 'mbisc-cu chjianti ed allegría,
E tutt’ 'u core 'u hazzu recriàre
Ccu bene duce de lu sangu mia.

Dopu stu viaggiu m’aju 'e rassegnare,
C’ 'a meglia parte d’ 'u paise núostru
Se trove’ tutta a chista banda 'u mare.

Chist’uocchji su’ cuntienti veramente,
Vídanu 'i miegli amici e lli cumpagni
E giuvenotti chi 'un canusciu 'e nente.

Laghitanelle de bella higura,
Ogne sorrisu ie’ 'nu raggiu de sule
Chi cangie’ puru la temperatura.

E tra le note de la cuntentizza
Suspiranu 'e chitarre e lli poeti;
'U paise d' 'u Lagu ie’ na ricchizza!

L’affettu vuostru, 'e grandi e piccirilli,
'U puortu intra stu core, e tutti l’anni
'U 'mbisc-cu ccu llu mele d' 'i turdilli.

Rituornu de stu viaggiu, e alla ricota
Lavuru notte e jurnu, ca n’atr’annu
Si me 'mbitati viegnu n’atra vota.

Mille ringraziamenti, aju hurnutu.
Agúri ppe llu club e ppe lla strina,
Ve lassu 'a bona notte e be salutu!