Dopo alcuni anni vissuti lontano dall’ambiente della “strina”, l’autore compone un testo a rima incatenata stile strina” e lo spedisce via e-mail a Piero Mazzotta, ottimo cantastrine, suonatore di chitarra e mandolino, nonché compagno di tempi passati insieme meravigliosamente, esortandolo a ritrovarsi per suonare e cantare e godersela ancora, con “quattro amici e una spaghettata”.

Metro - Terzine di endecasillabi a rima incatenata

Caru strinaru, caru sonature,
Cumpagnu de nuttate a “meraviglia”,
De tiempi bielli, chjini de sapure,

Signu luntanu de parecchie miglia,
Ma ccu llu core te signu vicinu;
Salutu tutta quanta la famiglia.

Tiegnu guliju 'e 'nu bicchieri 'e vinu,
E ssi nde tieni voglia puru tuni
Ppecchídi 'un preparamu 'nu festinu?

Chjiamamu puru l'atri sciampagnuni,
Ca 'u nn'amu hattu cchjiui 'na chjicchjiariata
De quandu u “cunnu” ie' mmanu alli guagliuni.

Si st'annu te vue hare 'na sunata,
Ia vulissi chjiamare quattru amici;
Cantamu 'a strina ccu 'na spaghettata.

Piensi ca pue venire? Cchi mme dici?
Tenate pronte ca ncu 'a sira chjiamu
E ne gudimu cuntienti e felici!