Ve puortu 'i miegli aguri e be salutu.
Brindamu tutti quanti all'annu nuovu,
Ca 'u viecchjiu n'a' lassatu e si nde jutu.

Ia signu amante de lu biccheriellu
E bivu ca me scinde' chjianu chjianu,
E me refriscadi anima e ciarviellu.

Accumpagname tu chitarra mia
E fammile truvare due parole,
Ca le 'mbisc-cu ccu binu ed allegría.

E cantu a cchine tene' quattru amici
E 'nu jurnu de viernu, quandu chjiove',
Trivillanu la vutta e su' felici.

Ia cantu a mmia chi m'aju 'e 'mbriacare,
A cchi' ammazze' llu puorcu, a cchi' se spusa',
A cchine vive' ppe dimenticare.

A cchine cuomu e mmia a' sempre vivutu,
A tutt' 'i buttigliuni e lle buttiglie,
Chi si lu jettau puru ccu llu 'mbutu.

Cchi mala sciorta chi aju avutu ia;
Ppecchí me signu juta a maritare?
Tu si lla cruce de la casa mia!

Oj Catarina mia ca nun te 'mbruogliu,
Ca tuni si' lla vite ed ia lu pavu;
Tu si' lla vigna ed ia chine te cuogliu.

‎'A cuchjiusione tua ie' sempre chissa
Ed ia àju 'e arraggiunare ccu llu vinu;
Si nde vuo' fare sulu ppe lla Missa!

Tu si' 'na pendulilla 'e marvasìa,
Ccu lli cuccilla duce duce duce,
Si' llu sapure de la vita mia!

De n'uominu de hezza cchi nde vue'
Si nun te cangi sa capu chi tieni,
Tu va' a fini' 'ngalera primu o pue.

Signora signu lu vicinu 'e casa,
Si Peppe nun la smette' ccu ssu chjiassu
Ia l'aju 'e rappurtare a ncuna rasa.

Oj buon'amicu cchi buliti hare?
‎'Un mi lu denunziati ppe piacire,
C'avimu 'na hamiglia de campare!

Cara Catarinella mue ve dicu:
"Ia sa vrigogna la hazzu hinita,
Ve dugnu la parova 'e Mastru Ricu".

Díciale a cchissu chi s'ie' lamentatu,
Ca 'ull'au ligatu buonu lu villicu
E lle dove' lla panza 'e quandu ie' natu.

Voi bruttu scelleratu e mascarzone,
Ia vaju all'arma d' 'i carabinieri
E ti la hazzu dare 'na lezione.

‎'A hamigliella tue' l'a' ruvinata.
Mue n'atru pocu te piombe' lla legge;
Hurtuna mia ndo signu capitata!

Bella signora ccu lla camicetta,
Scusati, me sapiti 'nderizzare
‎'A casa 'e Peppariellu d' 'a Galetta?

Eccume! Alli comandi, brigatieri
‎'Mpersuna Peppariellu se prisente'
Trasiti ca ve úoffru 'nu bicchieri.

Bada ca ia nun signu n'uomu 'e vinu;
Rispetta la divisa e lle stillette,
Favorisci 'ncaserma malandrinu.

Ve circu scuse si v'aju mancatu,
Ve vulíe' sulamente dare a bive'
Criju ca 'ud'e' cummessu 'nu reàtu.

Dúname documenti e statte cittu!
Saluta l'appuntatu Rompiglioni,
Iza 'na gamba e camina derittu.

Vui appuntatu mi lu perquisiti,
E secundu la regula de legge
Scriviti lu verbale e m' 'u lejiti.

Me pare n'úominu periculusu,
Vàstadi allu guardare intru la hacce:
"Tene' n'uocchjiu rapiertu e n'atru chjiusu".

Amicu, m'aju 'e minte allu sicuru,
Iza le manu a paru de la capu,
Girate 'e spalli e arribate a ssu muru.

Eccu cchi l'e' truvatu sutt' 'a giacca:
‎'Nu mienzu fiasco 'e vinu casarecciu,
E 'nu paru 'e bicchera intra la sacca.

Rimana hermu llúocu ca ia scrivu,
Ma cca cc'ie' 'na denunzia 'e l'annu scorsu                   
A quantu pare tu si' recitivu.

Vi nde putiti ha' puru 'nu quatru;
‎'Un cunsumati la carta e lla pinna,
Ca l'annu chi vene' nde scriviti n'atru.

Silenziu, nun parra', nun t'ie' permessu!
Ogne parova chi t'azzardi a dire
Venadi usata contra a ttia stessu.

Derizza la visíeri d' 'a berretta,
E ssi 'un bue hatta la cuntramenzione
Abbuttunate bona la vrachetta.

Lu dichjiaru in arrestu immediatu;
Mintalu intra pped'ubriachezza
E ppe disturbu a tutt' 'u vicinatu.

Si íesciu de sta cella sutterrana,
A cchillu gran curnutu 'e mastru Ricu
Le hazzu l'úocchji cu' 'na damigiana.

Caru papuzzu mia, cchi t'anu hattu?                          
Chin'íedi chi t'a' chjiusu a sse cancelle?
Si tu m' 'u dici, ia mi lu sbarattu!

Va', vatinde alla casa ca t'ammazzu;
E bieni porta 'na buttiglia 'e vinu,
Ca signu assiddatu cu' 'nu cardunazzu.

Ia vaju e tuornu apede suvu suvu;
Ma tu m' 'e duni 500 lire
C'aju ruttu tutt' 'i càvuzi allu cuvu.

Voi papu m'a' mandatu zu' Nicova
Ca ie' liberata 'a crapa 'e Mastru Ricu
E s'a' mangiatu 'i viti alla "Guardiova".

Va porta a mammarella la 'mbasciata,
E jatile haciti na qualèra
Supra 'nu hogliu de carta bullata.

Ordine d' 'u comandu superiore:
M'anu telefonatu ppe 'mpacchjiare
A Mastru Ricu intra e a Peppe hore.

Vieni de chista parte oj Catarina,
Ca vuogliu trivillare la carracchjia;
Ajutame a mantene' la varrina.

E doppu va prepara 'nu spuntinu;
E porta 'na curuna 'e saramienti
Pped'onorare 'u Dia de lu vinu.

Me scuvu sa carracchjia e mi nde fricu.
E sona chitarrella ca cantamu
Alli mustazza tisi 'e Mastru Ricu!

Ia ve salutu a tutti quantu siti;
E benedittu sia llu jurnu e l'annu
Chi l'úominu chjiantau lli primi viti.

Ccu n'atra strofa e ccu n'atru bicchieri:
Salutu 'amici mia e lli paisani
All'appuntatu ed allu brigatieri!